22 July 2008

Nuclear francés, fòra d'Occitània!

Lei 7 e 18 de julhet passats, doas pèrdas d'urani dins l'environament, a Tricastin e Romans (Daufinat), oficialament «limitadas», mostrèron lei falhas e dangiers dau nuclear civil en Occitània. Mai grèu: lo 15 de julhet, aprengueriam la pollucion radioactiva deis aigas de Tricastin, deguda, çò dison leis autoritats, a l'enterrament de 760 tonas de curum nuclear militar.


Cèrtas, lo ministre de l'ecologia, Jean-Louis Borloo, ditz voler metre clòta la filiera nucleara, e la societat responsabla dei pèrdas d'urani, Areva, s'engatja a mai de transparéncia e de seguretat, mai a Iniciativa per Occitània nos acontentarem pas de bèlei paraulas! Denonciam vigorosament la politica nucleara francesa que, sota leis escampas de l'independéncia energetica e de la lucha còntra lo rescaufament climatic, met en perilh la santat e la vida deis occitans e occitanas e cèrca, en vendre sa tecnologia, de multiplicar lei centralas electricas nuclearas dins lo monde.


De segur, remplaçarem pas lei centralas nuclearas per de centralas de carbon o de petròli emissoras de gas amb efiech de sèrra, mai una autra politica energetica es possibla:

    1) reduire lei degalhatges per esparnhar l'energia, que lei ressorsas de la planeta son pas inagotablas, e perpensar a de modèls economics e sociaus mai ecologics;

    2) desvolopar leis energias renovelablas per que vengan lèu-lèu la fònt màger de la produccion energetica.

    Pasmens, l'estat francés còta de privilegiar l'energia nucleara, mentre que la region alemanda de Baden-Würtemberg a decidit que d'ara endavant leis ostaus nòus foncionaràn amb d'installacions energeticas ecologicas, o que l'ancian vicepresident american Al Gore a prepausat que leis Estats-Units, en 10 ans, anen vèrs una produccion d'energia exclusivament renovelabla, çò qu'interèssa tant Barack Obama, lo candidat democrata a l'eleccion presidenciala americana, coma John McCain, son rivau republican.

    Iniciativa per Occitània condemna donc l'arcaïsme e l'irresponsabilitat energetics de França, demanda per Occitània lo mestritge de sa politica energetica e crida totei leis occitans e occitanas a bastir una Occitània que, au contrari de l'estat francés, se mainarà de la santat e de l'avenidor de sei ciutadans.

FREE OCCITÀNIA!

Lo 22 de julhet de 2008

Iniciativa per Occitània

No comments:

Post a Comment